” كلاب الطريق ” .. قصيدة للشاعر محمد الشرقاوي
زي كل الناس ما عايشة
عيش يا عم
حلم عمرك فكرة طايشة
صراع وهم
والكلاب مالية الطريق
والأمل أصبح غريق
حتى بسمة من صديق
تحكي كل خداع ورسم
والمهارة باختصار
لما تظلم أو تبيع
تلقى فرحة الانتصار
لابسة ألوان الربيع
والحيارى صف واحد
والزحام فوق الرصيف
مين يجاوب مين يساعد
قلب محتاج الرغيف
واللصوص عايشين ملوك
لو تشاور يطعنوك
لو تجادل
لو تعاند
لو تقول الرحمة تاهت
بالحجارة يرجموك
والضمير عايش في أزمة
جوه بقه ألف جزمة
زحمة من غير أي لزمة
والشعار الحال تمام
صبح تايه في الدروب
ليل طويل
لاجل لقمة تعيش حروب
خايف ذليل
والسلاطين اللي غاصوا
في الفساد طول السنين
ضيعوا الأجيال ما تابوا
سرقوا حلم الطيبين
واللي عاش في الوحل صامت
واللي عاش دلدول وساكت
واللي نايم
واللي عايم
واللي طول الدهر صايم
قلب هامس قلب كابت
والحكاية في النهاية
اللي مقسوم لك يا عم
قصة من ساعة البداية
فيها حكم وفيها حسم
يبقى مش لازم تخاف
ع اللي فات أو ع اللي جاي
عيشها راضي باختلاف
بين ظلام فارش وضي
قول لنفسك كلمة واحدة
زي كل الناس ما عايشة
عيش يا عم
حلم عمرك فكرة طايشة
صراع وهم