رمضانيات .. الجيش الأبيض للشاعر محمد جابر
صيام وقيام
شهرنا رمضان
بركاته بتحضن أيامنا
لياليه ما تنام
شهر القرآن
كرمه بيهل على ديارنا
الرابع منه ده محبة
للجيش الأبيض يا أحبة
في ايديكو دوانا ويوماتي معانا
يا ملايكة رحمة وأطبا
واقفين بسلاحكم تحمونا
من طب ودوا راح تكفونا
وبإذن الرحمن تشفونا
من رعب غريب اسمه كورونا
الصف الأول ده مكانكم
في وش الوبا شادين حيلكم
في نهار الصوم شايلين روحكم
على كف الخالق وحارسكم
وفــ ليل رمضان انتوا سهارى
على راحة المرضى بجسارة
رايحين .. جايين من غير هدنة
وجهودكم أصل ما يدارى
إخلاصكم تاج نعرف قدره
خليتوا المستشفى دياركم
ونسيتوا أهلكوا وعيالكم
يا رب يبارك يا أحبة
من غيركو حياتنا تكون صعبة
في المحنة تتكاتفوا أيادي
والصعب يمر يكون عادي
ومصر تقولكم يا أولادي
يا فخري ويا كل فؤادي
مرفوعة رايتي وقوية
بيكم يا جنود البشرية
وتأموا عالمنا بعلومكم
ويأمنا رمضان في رحابه
بصيام وقيام
شهرنا رمضان
بركاته بتحضن أيامنا
لياليه ما تنام
شهر القرآن
كرمه بيهل على ديارنا