“تمن السيجارة” ..قصيدة للشاعر محمد الشرقاوي
تمن السيجارة يا ذكي
يعمل كتير
ينقذ مريض
ينقذ يتيم
يسعد فقير
ويعين جريحة وأرملة
في سنين جفاف
وعيون بتندب حظها
في ليل السعير
اسمع دموع المحتاجين
والمكسورين
واجعل شعارك يا ذكي:
الرحمة دين
فكر عشان يوم الممات
يوم الحساب
تفرح بصدقة عملتها
ما تكون حزين
طالع بتنفخ في الهوا
قلبك فوق النار استوى
ولا يوم بتسأل ع الدوا
وتقول آمين
إيه الحكاية قول لنا
وتعال ننصح بعضنا
العقل فين من شرعنا؟
والعلم فين؟
ابنك وبنتك لو شافوك
يسترخصوك
لو قلت مرة نصيحة غالية
هيضحكوا
ويستغربوا
ولا يسمعوك
مبقتش قدوة خلاص يا عم
غيرك أهم
صاحب يشد بعيد هناك
لهلاك وسم
وأكيد هتبكي على الضياع
أصل السيجارة يا ذكي
وهم وخداع
شيطان رجيم
راسم بشدة خطته
وأنت مواصل الاستماع
هو انت ضامن
تلقى بكرة لقمتك
جايز يكون الفقر راصد خطوتك
مد الإيدين للمحتاجين
أو حتى وفر صحتك
خليك بصير
شوف النهاية والمصير
جايز تقابل بكرة شدة تهزمك
أو يوم عسير
وساعتها هتعض الصباع
وتلاقى يومها الكل باع
وتشوف دموعك ع الخدود
وتلاقي أولادك جياع
ارجع بسرعة بلاش عناد
للموت ميعاد
اهجر معاصي مكتفاك
واسمع كلام رب العباد
والذنب مهما يكون خطير
ربك كبير
ربك رحيم
لو عدت نادم مستجير
تمن السيجارة يا ذكي
لو تحسبه
يعمل كتير