وجت ف الحلم وزارتنى
حضنتنى وباستنى
ومسكت ايدى وقالت لى
صباح الخير
صباح أبيض على عيونك
صباح مالى الجناين ورد
وحشتوني
وحشني طيف اساميكم
وحشني ضحكة الغاليين
وحشني لمة العيلة
وحشني الدفا فيكم
وحشني ضى أحلامكم
وحشني نور أمانيكم
وحشني قعدة السفره
وضحكات البنات فيها
ونظره عينك الحلوة
سكنت الصمت ماخرجتش
لسانى سكت
مانطقتش
فبصت لى وقالت
ايه
مافيش كلمة وحشتيني
مالك ساكت
مافيش ولا حس ولا منطق
صرخت وقلت ياسميه وحشتيني
ورب الكون وحشتيني
وحشتيني لمليار سنه جايه
اهى الكلمة سبع أحرف
لكن مش قادره توصفنى
وحشتيني ماهش كافيه
ولا وافيه ولا قادره
تكون شافيه
ياخلق ياهوه
قولولها انى مابنمشى
وان عيونى
دواها رؤية الغالية
ياخلق ياهو
ده انا من كتر اشواقى
تملى اسمها حطه
ف كل كلام
انا باقوله
ف كل حنين انا حسه
ف كل قراءة للفاتحة
ف كل دعاء طالع منى
سمية القلب والننى
ولا يمكن منى تتنسل
لقيتها بالعيون ضاحكه
ولمعت بالدموع عينها
حلفت وقلت ياسميه ماتبكيشى
بلاش يبقى لقانا دموع
نخش بسرعة ف الموضوع
انا زعلان انا مخاصم
فبصت دوغرى واندهشت
مخاصم ليه
انا زعلتك يا ابو عيالى
صرخت وقولت ياسميه
بقالى كتير بادور كل يوم عنك
بافتش كل حلم وادور
واغوص ف بحاره ودروبه
واطلع بالايدين خالى
انا مالى
سيادتك فين
وليه عن حلمى مشغوله
لاقتنى جوه حضن طويل
قالت لى فيه ماتزعلشى
انا روحى تملى هايمه حواليكم
لكن مش عايزة اشغلكم
وضحكت ضحكة م الروعة
لقيتها نجوم بنورها زاد
جمال ليلى
فقلت بقلبى مع عينى
وربك العزيز اوعى
ياسمسم مره
تنسينى
وزورينى
ف المنام دايما
قالت حاضر
يارب الجنه تجمعنا
ونبقى صحبه جواها
سلام دلوقتي يا حبيبى
بأذن الله أنا هاجى
ف يوم تانى
ونتكلم ونتسامر
لحد الشمس ماتنور
سلام دلوقتي يا عاطف
سلام بالحب ياسميه
