“دوخينا يا لمونة “.. قصيدة للشاعر محمد الشرقاوي

دوخينا يا لمونة
ياما قالوا وعشمونا
بس باعوا كل كلمة
وفي ظلام الليل رمونا
دوخينا
دوخينا
دوخينا يا لمونة
——————
ألف كدبة في كل ثانية
والوجوه من غير كسوف
والمحاورة بنت غانية
واللصوص هم الضيوف
والطبول لازم تساعد
والملامة في صف واحد
واللي ينطق يبقى جاحد
لو بدمعة يقول راعونا
دوخينا
دوخينا
دوخينا يا لمونة
——————
الأمل مربوط في صخرة
ساكنة في عمق المحيط
والعيون مشحونة حسرة
والشعار (اعمل عبيط)
والليالي بالهموم
والسما فرشت غيوم
بكرة هنقضيها صوم
بس مين هيفطرونا؟
دوخينا
دوخينا
دوخينا يا لمونة
——————
كل أفكارهم خيابة
واحدة عمية واحدة عورة
والحياة غلب وكآبة
صورة توصف ألف صورة
بكرة خايف م النهاردة
والعقول في اليأس شاردة
والذئاب بالقوة فاردة
حلفوا لازم يطحنونا
دوخينا
دوخينا
دوخينا يا لمونة