“يا محصل الكهربا” .. قصيدة للشاعر محمد الشرقاوي
يا محصل الكهربا
كهربنا بالراحة
عداد حياتنا اشتكى
وبقولها بصراحة
خربت هنا المفاتيح
وشبعنا من تصاريح
والجيب مريض وجريح
والعيشة سفاحة
والليل طويل بهموم
محتاجة لجراحة
والكابل بيعاني
تايه في عنواني
والدنيا حاسداني
على صبر وسماحة
يا محصل الكهربا
يا محصل الكهربا
أرجوك عشر مرات
كهربنا بالراحة
——————
يا محصل الكهربا
كهربنا بالمعقول
الفولت زايد قوي
ساب الأمل مقتول
نصرخ ماهوش نافع
ولا حد بيدافع
طيب مين هيترافع
في قضية عن مجهول
أو مين هيتكلم
مع حضرة المسئول
يحلف يقول بشويش
الحالة ناطقة مفيش
والشاطر اللي يعيش
من غير جنان وذهول
يا محصل الكهربا
يا محصل الكهربا
أرجوك عشر مرات
كهربنا بالمعقول