“ناس وناس ” ..قصيدة للشاعر محمد الشرقاوي
ولما الشعر يتكلم
تلاقي القلب بيسلم
وصاحب العقل يا صاحبي
أكيد دايما بيتعلم
قابلنا من البشر أنواع
فيهم شاكر فيهم طماع
فيهم صاين سنين الود
فيهم ناكر الجميل بياع
وناس رجعت وناس غابت
وناس من حزنها شابت
وناس فهمت كتاب الله
ولا جرحت ولا اغتابت
وناس بالقوة سرقونا
وناس حلفوا وخانونا
وناس لما نقول الحق
بسلطانهم يحاربونا
وناس عبدوا جنيه وريال
وناس نهبوا جبال أموال
وفاكرين الحياة باقية
ولا قالوا حرام وحلال
وراحوا لقبرهم في ساعات
وتاهت منهم السكة
ولا معاهم من الحسنات
صحيح ينفع ولا فكة
وسابوا سيرتهم السودة
هتفضل بينا موجودة
تقول أيامنا موعودة
تعيش محرومة م الضحكة
وناس شفناها بتجامل
لصوص أحلامنا بالكلمة
ورغم العلم تتعامل
وبتساند قلوب ظالمة
وتنصح كل طوب الأرض
وتنسى كل سنة وفرض
وبتبيع الشرف والعرض
وبعد دا كله مش سالمة
وناس رغم الجراح عايشين
بحكم اللي خلق راضيين
لا عمر الشكوى قالوها
ولو تعبوا سنين وسنين
حياتهم كلها ابتسامات
برغم الكد والمسافات
تلاقيهم مع الأيام
نفوس طاهرة من الأزمات
وناس ع الخونة تترحم
وتنسى أمة قتلوها
كنوز الشعب تتحرم
بكل ما فيها باعوها
بريئة الفاتحة من أندال
رمونا في المحن أجيال
عشان يحموا حريم وعيال
خدوا أعمارنا سرقوها
غريبة الدنيا يا مسافر
عشان خايب وبتعافر
تغير حكمة المولى
بأن حياتنا ليها آخر
وليه قابل تعيش موهوم
وفاكر دنيتك هتدوم
كفاية يا عم صحي النوم
وشوف حالا سورة غافر
وطهر قلبك العاصي
وفكر عقلك الناسي
وخلي دنيتك إيمان
تكون زي الجبل راسي
لا جرح يخاف ولا ظالم
ولا عصابات
تعيش باذن الحفيظ سالم
من المتاهات
وصدقني في يوم هتقول
نصحني بكلمته الشاعر
عشان انت هناك مسئول
عن الباطن عن الظاهر
وسلم ع اللي مش سامع
وبتمنى في يوم يفهم
أنا خايف يعيش ضايع
وفي الأخرة أكيد يندم
وبكرة نقول
قصيدة شعر من تاني
وفيها حلول
مشاكل صعبة عاصياني
سلام يا أمير
سلام يا كبير
وألف تحية من شاعر
بيزرع خير
ولما الدنيا تتأزم
ولما عيون حبايبنا
بتتألم
أكيد الشعر يا صاحبي
أكيد لازم
هيتكلم