ويعود شريط الذكريات
يحكي اللي فات
حبة مشاعر طيبة
وسنين ألم
وسنين وجع
وسنين آهات
أنا كنت فاكر قلبي فاق
من كل أوهام الفراق
لكن لقيته بيصحى طول الليل
ويبكي باشتياق
الحلم ساكن في العيون
مش راضي يبعد خطوتين
ولا يوم يهون
مش راضي يسمع كلمتي
إزاي هكون
كل الوعود
كانت بترسم فرحتي
كل الورود
كانت بتفرش سكتي
وانا تهت من سحر الكلام
وحفظت لحني وغنوتي
وجريت بسرعة مية صاروخ
وعشقتهم
فجأة التقيت كل الشروخ
طلعت قوام من عندهم
بشويش على قلبي الضعيف
ليه يا ليالي تبعدي
طعم الأمان وتقربي
لون الخريف
ليه العيون
كانت بتحلف ع الوفا
وبتخفي احساسها المخيف
أنا كنت إيه
أنا ذنبي إيه
أنا لسه حافظ
كل كلمة سمعتها
أنا كنت روحه
ودنيته وكمان عينيه
أنا سبت قلبي يتوه كتير
يمشي الحياة من غير سؤال
ماسك إيديه
لما انت مش عاشق بجد
لما أنت بايع أي حد
طيب ليه تحاصر خطوتي
وتقول وترسم ألف وعد
ارحل قوام
ضاع الاهتمام
أنا عقلي طول اليوم يقول
مليون حرام
ليه البراءة تشوف جراح
وتخاصم الأمل الجميل
والإبتسام
مهما الألم هيزيد أكيد
الفجر باين من هناك
راجع هيرسم ألف عيد
من غير هواك
أبعد خلاص
ارحل خلاص
أنا عيني شافت
بكرة جاي
لكن يا ظالم بوعدك
ما يكون معاك
