” ابتسامة ” .. قصيدة للشاعر محمد الشرقاوي
(١)
يا اللي ابتسامتك أمل
بتقرب المسافات
الفرح بيك اكتمل
والقلب عاش حكايات
والأرض من رقتك
رقصت على خطوتك
قول لي بقى كلمتك
وكفاية كده نظرات
يا اللي ابتسامتك أمل
بتقرب المسافات
(٢)
من وسط كل البشر
شاورت عيوني عليك
حتى النجوم والقمر
عشقت سهر لياليك
وحلفت مالي سواك
ولا عمري يوم هنساك
حلمي ومنايا رضاك
ترحم كتير آهات
يا اللي ابتسامتك أمل
بتقرب المسافات
(٣)
يا اللي ابتسامتك نور
شقشق مع العصافير
طيفك هنا محفور
حواليه غصون وغدير
طعم الأمان بيهل
لو تيجي يوم وتطل
مشتاق وعاوز حل
صابر معاك سنوات
يا اللي ابتسامتك أمل
بتقرب المسافات
(٤)
يا اللي ابتسامتك ندى
نازلة تبوس الشجر
عاشق بحبك شدا
ارحم دا قلبي في خطر
غيرك كتير ملايين
للوصل يوم طالبين
عاشوا شهور وسنين
ولا سمعوا غير سلامات
يا اللي ابتسامتك أمل
بتقرب المسافات
(٥)
يا اللي ابتسامتك عود
يعزف عليه فنان
ليه تبقى بينا حدود
ونحس بالحرمان
افتح جميع الابواب
علشان نعيش أحباب
نمسح جراح وعذاب
نرسم زهور وزينات
يا اللي ابتسامتك أمل
بتقرب المسافات
————————–
– من ديوان (عيون غزلان)