لعنة الست هى حاجة كدة زى ” لعنة .. الفراعنة ” تقدر تقول عليها موجودة ومش موجودة حتى لو طلع زاهى حواس وحلف لك بشرف أمه أنه مفيش حاجة إسمها لعنة الفراعنة ، وأنه شاف أهوال لما حب يعمل Scan لمؤمياء أحد الفراعنة ، وأنها صدف ، لكنه نسى إن البلد دى معمول لها ” تعويذة ” فى السماء مفيش حد ييجى عليها بقول أو فعل ويسلم أبدا ، بالظبط كده زى ماقال عمنا حافظ إبراهيم ” كم بغت دولة عليَ وجارت ثم زالت وتلك عقبى التعدي” وغنتها ” الست ” أم كلثوم إللى عاوز أتكلم عنها إنهاردة !!
لكن خلونا فى البداية قبل مانتكلم عن الست ، نقول أننا بنعيش أيام أول مانصحى الصبح وقبل مانقول ” يافتاح ياعليم .. يارزاق ياكريم ، نسأل : الهرى على إيه إلنهاردة ؟ أصل الـ Social Media بقت عامله زى إللى قال له : علمنى الهيافة يابا ، قال له : تعالى فى الفارغة وإتصدر ، الهرى على الراجل إللى قال للوزير بأقبض 2500 جنية فى الأسبوع فى المنطقة الصناعية بنجع حمادى وزمايله كانوا عاوزين يقطعوه حتت بعد ما الوزير مشى ، لانهم بيقبضوا “ألف جنية” فقط فى الأسبوع ، ودا بعد ما الراجل أخد اللقطة ومشى ، ولا على سيادته إللى قدم بلاغ فى عمار بسبب بوست ” الخشبة تخشينة الكوبرى ” إللى أعيد إحياؤها وبعد سين وجيم ، أفرج عنه بكفالة 20 ألف جنية ، وإتحطت له على الرف بسبب تهكمه على أكبر ساعة ، وعلى حواره مع الشاب السورى إللى قال له يروح يستصلح له عشرة خمستاشر فدان وياخد الجنسية !!
والحقيقة أنا عاوز أقف هنا لبرهه أتكلم فيها عن سياسة الدولة المصرية ” المرنة ” مع الأشقاء العرب ، لأن إللى سافر الخليج يعرف كويس أن قوانين العمل فى بعض الدول هناك ، تمنع تقلد الأجنبى درجة مدير ، يعنى ماينفعش المواطن فيها يكون مجرد موظف ومديره أجنبى ، حتى لو كان عربى وبالأخص المصرى ، والأجنبى أصلا ماينفعش يكون مالك ولاحتى يعمل سجل بإسمه ، ولكن بإسم المواطن إللى بيشاركه فى نص أرباحة وأكثر أحيانا ، إنما إحنا طيبين أوى يا خال ، عندنا الكرم والحنية والطبطبة والترحاب وكمان بناخدهم بالأحضان .
الهرى كان على مرار اللاجئين ودا لوحدة مرار طافح ، وعلى إللى عيشونا فى حفلة بكرى وعيال مبارك وما صدقنا الأمور تهدى ، دخلونا فى بكرى وساويرس ، أصل نجيب كل شوية يقوم يرمى قنبلة دخان ويخلى الناس زبادى خلاط ، من كام يوم قال : فى ظل غلاء الأسعار الحد الأدنى للأجور لازم مايقلش عن 15 ألف جنية ، والناس إتفاعلت معاه ” علمنى الهيافة ” .. إياها ، يقوم بكرى يسكت .. أبدا ، عمل له واحدة مرتدة : طبق الكلام دا على شركاتك الأول ، وحبكت العركة ، وعموما دى مش أول عركة بينهم ولا هتكون الآخيرة .
الهرى على غضب نشأت الديهى إللى تصدر التريند بدفاعه وزعله على الدولة المصرية ” الدولة مفيش على راسها بطحة ” تعقيبا على وثائقي أوربي ” فرنسى ـ ألمانى ” يصف رأس النظام المصرى بـ “الفرعون الجديد” ويحذر من إنهيار النظام ، أنا بس عاوز أقول له هون عليك .. إنت كده بتعمل دعاية للفيلم ، وخليك مع المثل العامى القائل ” تعوي الكلاب والقافلة تمر” أو “الكلاب تنبح والقافلة تسير” ، أنت وأنا وكلنا عارفين المؤامرة التى تحاك على مصر .. ودا شىء لايخفى على أحد .. خليهم يقولوا وعلى رأى وردة ” قولوا كمان وحياتكم قولوا ” !!
الصراحة .. الصراحة خيبة البرلمان مابعدها خيبة الإعادة فضحت المال السياسى وفارق الأصوات إللى تعدى بالـ100
ألف و50 الف صوت ، وإستغلال المرشحين للعوز والحاجه عند الناس ، والأمل قائم فى وضع حد لتلك المهازل سواء
بقرار سيادى ، أو إلغاء بحكم قضائى ، وعمل قانون محترم يليق بإسم وسمعة مصر ، ويضمن تمثيل عادل للمصريين
تحت قبة البرلمان ، الهرى على مشاكل لجان حصر الأماكن إللى ظهرت بعد التطبيق وخلت إيجار شقق “كعابيش”
أغلى من شقق “حسن صبرى” فى الزمالك ، والناس إللى قاعدة تنتظر معجزة
برضه ع الماشى كدة من كام يوم حصل موقف مش لطيف بين الفنان صبحى وسائقة الخاص لما إنفعل عليه بسبب
التأخير ، واخد منه مفتاح العربية ومشى ، ورجعونا لـ ” علمنى الهيافة ” ويدوب الدنيا هدأت دخلونا تانى فى خناقة
بسبب” الست ” وعلى رأى المثل كل إللى فات كوم ، ويهون ، قدام العركة الكبيرة ” المغفلقة ” على رأى الصعايدة
على “فيلم الست”
وركز فيلم الست مش ” لعبة الست ” بتاع نجيب الريحانى وتحية كاريوكا إللى إتعمل سنة 1946 ، يانهار أبيض هوا
إحنا كان عندنا سينما فى الأربعينيات ؟ أربعينيات إيه ياعم فوق .. دا إحنا السينما دخلت عندنا فى أواخر القرن الـ 19
سنة 1896 م ، وبدايتها الحقيقية كانت فى ثلاثينيات القرن الـ 20 بفيلم “الوردة البيضا ” وماقبله ، والمعلومة مقصودة
لراعى الإبل .
المهم الكلام عن ” الست ” وليس ” لعبة الست ” سواء كان الفيلم أو المسرحية إللى كان بطلها الفنان محمد
صبحى ، إللى دخل فى الخناقة الدايرة ، وخلونا نرجع تانى لـ ” مصر تتحدث عن نفسها ” إللى كتبها الشاعر حافظ
إبراهيم ونذكر ” شوال الرز ” أن سبب الهجوم على الفيلم سواء كان مبررا أو غير مبرر هو ” كره” المصريين لشخصك
تقول ليه ؟ أقول لك : لله ف لله ، تقدر تقول دعاء الوالدين عليك ، غضب من ربنا عليك ، عملك الردى .. ربنا وحده أعلم
إنت عملت أنهى” مصيبة ” ، وكلبك إللى طلقته على صبحى كان ” مصيبة أكبر ” وحاورينى ياكيكى لغاية ما نشوف
آخرتها إيه معاكم !!
الكلام أخدنا ونسيت اتكلم عن الفيلم يمكن لأنى مش عاوز أكون طرف فى الـ ” بروبجندا ” إللى إتعملت له على
وسائل التواصل وزودت إيراداته ، لما بقى أشهر من محل العصير إللى فى نفق العباسية إللى قال عنه عادل إمام “
وحش ماتشربش منه ” أشهر أفيه ” في مسرحية شاهد ما شفش حاجة .
يعنى م الآخر أنا مش عاوز أكون طرف فى العركة اياها ؛ رحم الله الست .. ويجعله عامر .
