” صوت القلب ” .. مجموعة خواطر للشاعر محمد الشرقاوي
(١)
وفي وسط الزحمة تلاقي حيتان
وتشوف العين مليون عنوان
تخلص من جرح تلاقي جراح
تهرب من ديب يطلع تعبان
تحلف وتقول أنا مش طماع
أنا بس كرهت نفاق وخداع
وحلمت أتخلص من أوجاع
واهرب وامسح كل الاحزان
أنا طالب بس شبيه للروح
أنا طالب بس أعيش إنسان
(٢)
أنا عايش فيها أديب رحال
رحال بمشيها بشوق أميال
من شرق لغرب شمال وجنوب
والفكر يعود زي الشلال
وبداوي جراح الناس بحروف
بتخلي الأعمى بجد يشوف
أنا ضد اليأس وضد الخوف
أشعاري بترسم كل جمال
احفظ يا زمان اكتب يا تاريخ
شرقاوي يا دنيا أديب رحال
(٣)
مهما الليل بيعاند لازم
تطلع شمس على الصادقين
تلقى النور الطاهر راسم
باقة فل مع الياسمين
تكتب قصة وأحلى قصيدة
تشوف الدنيا بنظرة جديدة
زي الطير بيقول تغريدة
تشفي قلوب كل العاشقين
مهما الليل بيعاند لازم
تطلع شمس على الصادقين
(٤)
مش عاوز أشوف أخبار طواغيت
ولا صورة حد من الهلافيت
كم مرة يا قلبي تصدق ناس
تلاقيهم أخطر م العفاريت
وتلف تلف في دايرة مرار
ما ينوبك منهم غير أخطار
العين تضحك والقلب شرار
وعليك اللوم إنك حبيت
لو ناوي يا قلبي تعيش في سلام
ابعد عن سكة ناس عفاريت
(٥)
لما تمشي كل خطوة
وانت واثق في الإله
كل قلب نظيف ما خاف
مستحيل
ولا عمره تاه
كل لحظة صدق ترسم
للعلا مليون طريق
كل عزم حديد بيصنع
للبشر حق الحياة