” يا مسئول ” .. قصيدة للشاعر محمد الشرقاوي
يا عم يا مسئول
جربت تاكل فول
شهرين وسبعة وسنة
مش لاقي تاني حلول
واللا الكباب مكتوب
صبح ونهار وغروب
والفاكهة والمشروب
بالطن يا عسول ؟
يا عم يا مسئول
——————
يا عم يا مسئول
جربت تمشي في سوق
وتشوف عجب وذهول
ترجع حزين مسروق
وتعد في المساكين
تايهين على خايفين
وخناقة بالسكاكين
وفقير هناك مقتول
يا عم يا مسئول
—————-
يا عم يا مسئول
جربت تبقى مريض
طول النهار بتقول
في زحام طويل وعريض
الرحمة تاهت ليه
من عين سعادة البيه
ناقص نبوس رجليه
علشان يجيب بانادول
يا عم يا مسئول
—————-
يا عم يا مسئول
جربت مرة تشوف
فواتير بسعر مهول
وتحس طعم الخوف
من كهربا أو غاز
أرقام بقت ألغاز
سرقة على استفزاز
ترمي في طريق مجهول
يا عم يا مسئول
——————
يا عم يا مسئول
جربت تركب قطر
كل القزاز مكسور
جمهور واقف ع السطر
والبياعين مجانين
ومسجلين خطرين
بالقوة أهم بايعين
والسعر مش معقول
يا عم يا مسئول
—————–
يا عم يا مسئول
جربت وصل إيجار
وأمين واقف ع الباب
جايب لك الإخطار
بالطرد بعد ساعات
في العتمة والمتاهات
والمر جاي في كاسات
قصة وفيها فصول
يا عم يا مسئول
—————–
يا عم يا مسئول
جربت فرن العيش
وصاحبها كان مخلول
يزعق بشدة مفيش
ويبيع دقيق الشعب
والجوع يسبب رعب
والظلم قاسي وصعب
يصنع جبان وكسول
يا عم يا مسئول
—————–
يا عم يا مسئول
جربت تبقى غريب
شايفاك عيون البشر
عايش ملكش نصيب
في كرامة الإنسان
ساكت لكل هوان
وانت اللي بيتك كان
مفتوح وخير ميذول
يا عم يا مسئول
——————
من ديوان (عيون غزلان)