مواطن” ..قصيدة للشاعر محمد الشرقاوي
الميم مغلوب على أمره بجد
مش عارف يبكي ويشكي لحد
اللقمة عذاب
والعيشة هباب
معروض في مزاد مكتوف اليد
ساكن في زريبة ومش معتوق
ممنوع بسلامته يبص لفوق
وفي حادثة يغادر أو محروق
أو يغرق أو يجمد في البرد
الميم يا مواطن موت مكتوم
ولا تغضب حتى ولا تقول رد
ما انت المغلوب على أمره بجد
——————-
الواو واقف على خط النار
ممنوع ينطق كلمة أحرار
والفكر دموع
وأمل مقطوع
والقاضي يا ناس هو السمسار
والليل مش راضي بسرعة يفوت
اغضب يا مواطن من غير صوت
محبوس في البيضة تقول كتكوت
على راسه شاكوش يقتل مسمار
الواو يا مواطن وطي كمان
واشرب بسعادة عصير صبار
ما انت الواقف على خط النار
———————-
والحرف ألف يعني استسلام
حقي وحقك دا كلام أوهام
من إمتى عبيد
بتفك حديد
أو ترسم شمس بتمحي ظلام
الطير بيهاجر بس حزين
ارحمنا يا رب من الظالمين
قدمنا السبت ومش لاقيين
الحد وصار الحلم ركام
والقصة بقت أوجاع ودموع
خدعونا وعشنا العمر نيام
والحرف ألف يعني استسلام
——————–
الطاء يا مواطن طير طيران
مش ناقصة هموم وغيوم وجنان
الأرض براح
والحلم سلاح
والعلم ضروري في كل ميدان
اكتب بعزيمتك قصة نور
وارسم بستان وغصون وزهور
كان غيرك نكرة وصار مشهور
وحكايته مسافرة في كل مكان
الحلم يا راجل عمر جديد
الحلم أكيد يصنع إنسان
والطاء يا مواطن طير طيران
——————
النون يا مواطن ند بند
لو ناوي تكمل انهض سد
الدنيا صراع
مليانة خداع
صحصح يا عزيزي عزيمتك شد
الإيد في الإيد الظلم يخاف
ويموت من بعد حصار وجفاف
ويعود العدل مع الإنصاف
والفجر ينادي تعالى ومد
الليل بيودع أرض وناس
وأنا همسح أي عيون بتهد
والنون يا مواطن ند بند