” لما واحد كلب ” .. قصيدة للشاعر والأديب محمد الشرقاوي
( ١ )
لما واحد كلب يبقى
أغنى من مليون أديب
أغنى من مليون معلم
أغنى من مليون طبيب
أغنى من مليون مزارع
واللي باتوا في المصانع
واللي خطبوا في الجوامع
تبقى كارثة وألف عيب
لما واحد كلب يبقى
أغنى من مليون أديب
( ٢ )
لما واحد كلب صايع
يشتري مينا ومدينة
جاي يحارب كل نافع
يرسم الدنيا الحزينة
والعلوم تهرب عشان
عايشة في بلادنا الهوان
ضاعت الأحلام يا مان
والطموح أصبح غريب
لما واحد كلب يبقى
أغنى من مليون أديب
( ٣ )
لما واحد كلب يلبس
سلسلة وشورت وشراب
كل لحظة يقول ويغرس
في القلوب جرح وعذاب
يبقى امتى نعود يا فاهم
من طريق مليان مظالم
مش هيبقى حد سالم
لو رضينا بحال عجيب
لما واحد كلب يبقى
أغنى من مليون أديب
( ٤ )
لما واحد كلب جاهل
يبقى قدوة للشباب
كورة تافهة وفيلم سافل
فجأة يصعد للسحاب
والعباقرة على الرصيف
حلمهم بس الرغيف
يبقى بكرة أكيد مخيف
والأمل أصبح لهيب
لما واحد كلب يبقى
أغنى من مليون أديب
( ٥ )
لما واحد كلب يجمع
في احتفال مليار دولار
يطعن الأجيال ويصنع
كل خسة وكل عار
والعيون مش ناوية تبكي
والقلوب مش ناوية تشكي
والوجوه بالصمت تحكي
خلت الأزهار تشيب
لما واحد كلب يبقى
أغنى من مليون أديب