” ملعونة” .. قصيدة للشاعر و الأديب محمد الشرقاوي
ملعونة صبح ومسا
ملعونة بنت الكلب
العلم ضاع واتنسى
وحياتنا جهل وكرب
مرسوم نعيش أزمات
ونتوه مع المتاهات
نسمع كتير خرافات
ترمينا وسط الصعب
ملعونة صبح ومسا
ملعونة بنت الكلب
————————–
ملعونة لما تشد
طفل وعجوز وشباب
تكسر عزيمة ويد
تقفل هنا الأبواب
والكل ينسى طموح
ويعيش ألم وجروح
والحلم مش مسموح
إلا بطريق النصب
ملعونة صبح ومسا
ملعونة بنت الكلب
————————–
ملعونة لما تكون
مصنع من الأوهام
تفرض سقوط وجنون
والعقل فيها ينام
ما بين هتاف ونشيد
هي الأمل والعيد
والكل ليها عبيد
عايشين في ساحة حرب
ملعونة صبح ومسا
ملعونة بنت الكلب
—————————-
ملعونة لما تقول
فيها البطولة يا عم
يبقى الذكي مجهول
طافح المرار والسم
والكابتن اللعيب
مليار في أصغر جيب
يا دنيا حالها عجيب
على مين يكون الذنب ؟
ملعونة صبح ومسا
ملعونة بنت الكلب