” مليون حكاية ” .. قصيدة للشاعر محمد الشرقاوي
مليون حكاية ومسألة
واقفين طابور
ضاع الغدا وضاع العشا
وطالبين فطور
الغدر واخد في الطريق
كل اتجاه
والفرحة واقفة هناك بعيد
رافضة الظهور
أما الأماني الطيبة
عايشة أسيرة لوحدها
بين السطور
تحلم توشوش قلبنا
وتمازح الأغصان وتصعد
في الفضا ويا الطيور
وتسامر الصحبة الجميلة الطيبة
وتصافح الياسمين
وتضحك للزهور
الشمس بتعاتب هنا كل النيام
النوم حرام
النوم بيسرق عمرنا
وتضيع معاه أجمل عصور
ونلاقي روحنا
بعد عمر من الشقا
للخلف دور
مش كل خطوة نتوه
ونغضب في الزحام
ولا كل فكرة تضيع
عشان حبة كلام
أنا كنت بحصد قبل كل الناس
هنا ألفين وسام
والكلمة مني تلف كل الكون
وترسم فرحته بعد الكسور
ليه العزيمة تفر من
أرض الحضارة والتاريخ
وتروح تعيش عند اللي كانوا
بدون معالم أو جذور
أنا سامع الأمل الجميل
بيقول بصوت المخلصين
خليك أمين
إياك تبيع حلمك ولو
طالت سنين
احلم كمان
واكتب كمان
واصعد وزاحم
وسط أسراب النسور
واحفظ كلام الصادقين
والعارفين
خليك صبور
خلي شعارك غنوتك
تغلب قلوب الحقد
والزيف والشرور
يا صبح لو بتحبنا
لازم تعود
الليل بيسرق حلمنا
ويشدنا عند القبور
وانا كل راس مال هنا
قلبي الغيور
وارث نصيحة من جدود
عاشوا بكرامة وسطروا
أمجاد بتحلف إنهم
سبقوا البشر
سبقوا العصور