المستشار علاء سليم يكتب : افهم علشان ولادك يفهموا منك الحقيقة !
خلينا نتفق من البداية أن مقولة زمن انعدم فيه الشرف دي مقوله صحيحه ، وخلينا متفقين ان احنا في زمن الغاب والكل عاوز ياخد حقه وياخد اكتر من حقه بأي وسيله ، وخلينا نتفق إن مفيش،حاجه اسمها الوطن العربي والوطن الأكبر ، وأن العرب امتداد لمصر وعمق استراتيجي الكلام ده عفى عليه الزمن وأصبح رضا أمريكا والصهيونية العالمية أهم من علاقات العروبه والإسلام والكلام ده .
وخلينا كمان نتفق أن كل دوله سواء دولة عربيه أو صديقه أهم حاجه عندها مصالحها بغض النظر عن الولاء والانتماء
والمصالح والاتفاقيات .. الخ يعني لازم نفهم أن العلاقه بين مصر وإسرائيل حتفضل علاقة حرب إلى يوم القيامه
وعلاقة مصر مع الدول العربيه لن تكون متناغمة ومتفاهمة بسبب اختلاف المصالح والضغوط الامريكيه على الدول
العربيه لقطع أي علاقات اقتصاديه وسياسيه ممكن تنقذ مصر في محنتها .
لو اتفقنا على كل الكلام اللي فات يبقى ممكن نفهم كويس الكلام اللي جاي وعلشان نفهم لازم نسأل مجموعة
اسئله ونحاول نرد عليها :
هو ليه العالم بيضغط على مصر علشان تقبل بصفقة القرن مع اسرائيل ؟ وليه إسرائيل بتتحرش بمصر بدون سابق
انذار ومقدمات ؟ وليه العرب تخلو عن مصر ؟
بدون سابق إنذار جماعة حماس ضربوا اسرائيل في مشهد كان تفسيره أنه سيناريو مترتب مسبقاً واعطوا فرصه
لإسرائيل في سحق غزه وتحريك ملف التهجير، واسرائيل طبعا عايزة تخلص من غزة وترحلهم لمصر في سينا وكده
تضرب كذا عصفور بحجر واحد تخلص من حماس وتخلص من غزة وتخلص من فكرة فلسطين بالكامل وتبقى فلسطين
ملك لإسرائيل ملكية خالصة وتبقى خلصت من الصداع القديم ويبقى مفيش تهديد لامن اسرائيل وننقل التهديد إلى
سينا .
طيب ليه العرب موافقين على تهجير أهل غزه وأنهم ياخدوا اراضي من سينا يعيشوا فيها وتكون وطن بديل؟ وليه
العرب باعوا مصر وباعوا القضية ؟
تمام كلنا سمعنا من فترة عن مشروع الهند اوروبا وربط الهند بالاتحاد الاوروبي عن طريق الامارات والسعودية ثم
اسرائيل والبحر المتوسط واوروبا .. والدول العربيه المعنيه مفيش عندهم مانع من تنفيذ المشروع الهندي الأمريكي
الخبيث لأن دي منافع لهم بصراحة من ناحيه وتنفيذ لمخطط أمريكا وإسرائيل من ناحيه تانية ومكافأة لهم علشان
ينضموا لجبهة أمريكا وإسرائيل واوروبا ضد مصر لعدم موافقتها على فكرة التهجير ، حتى لو كانت النتيجة ضرب اقتصاد
مصر من خلال تعطيل مصدر هام للدخل القومي المصري في قناة السويس .
المصريين فهموا اللعبه في هدوء شديد وأعلنوا عن تنفيذ مشروع طابا البحر المتوسط علشان تقتل مشروع الهند
الامارات السعودية اسرائيل ، وتعمل منفذ تاني من طابا على خليج العقبه
بمعنى تاني لما اسرائيل تهجر الفلسطينين لغزة يبقى أخدوا ارض فلسطين بالكامل من غير تهديدات امنية وتبقى
سيناء غير آمنه بفضل مشاكل الفصائل المسلحة للغزاويه وبكده يضربوا خط التجارة الدولى المصري بتاع طابا العريش
وأي استثمارات مصرية في سينا .
وكده يبقى فهمنا ليه دول خليجية بتضغط على مصر عشان تقبل بفكرة التهجير وصفقة القرن لانهم جزء من مشروع
الهند اوروبا ، يعني حجم المؤامرة على بلدنا كبير .. عشان كده لازم نفهم كمان إن الجبهة الداخليه مليانه خونه
ومنتفعين ومخربين سواء بقصد التخريب والخيانه أو بقصد التربح والغش وزيادة الإسعار وتضييق على الناس أكتر من
الضيق اللي شايفينه وبالتالى خلق مناخ سلبى ضد القيادة السياسية والدولة ، يعنى من الآخر دعم المخطط اللي
جاي من خارج ضد مصر قيادتها السياسية .
مهم جدا تفهم ما بين السطور وبلاش ترمي اللوم على البلد واعرف اننا كلنا والبلد والقيادة السياسية في خندق
واحد وبنتعرض لضغوط من الغريب والقريب من الأعداء والأصدقاء .. يبقى لازم نتماسك ونكون متأكدين إن الله لن
يخزلنا أبدا ابدا والنصر قريب بإذن الله .