قلت أنا خارج يا… أمه وجاي
واصل كده مشوار على طول
بصت بعيونها وندهت لي
راح تتأخر
قلت دي فركة كعب يادوب
قبل ماتشربي حتى الشاي
نفسك أيه…. أجيبه معاي؟
هاتلي زماااااااان.. وياك ياضنايا
استغربت وقولت أنا ……حاضر
بس زمان ده أجيبه….. ازاي
حاضر ياامة …..كلامك ماشي
كل الخير يحضر قدامك
ست الكل عليها تقول
وأحنا ننفذ أمر جنابك
روح ياضنايا يعلا مقامك
والعاصي يهدى لكلامك
هات بالمرة مخدة راحة
معمولة من طولة البال
كسوتها حرير الرايقين
لما راسي تحط عليها
ألقى نفسي عليها بنام
وارتاح راحة كل سنين
وكمان قلب بيصفى بسرعة
يزعل أه….
بس صفاه موجود
ف الحال…
على كتفه
تلفيحه وشال
هات ف أيديك
حبة هنا…
على حبه سرور
من فدادين راحة البال
تلقاهم ف يمين الفرح
بالمره هات كبشة فرح
بس اتوصى ف فرحك حبه
وأملا جيوبك منه كتير
وأنت معدي هات لنا قفل
عايزه ياحاجه القفل ده ليه؟!
نقفل بيه باب الأحزان
أصل هواها مابيريحشي
وكمان هات قراطيس من صبر
هات من نوع مابيخلصشي
وكمان ضحك من الجلاجيل
طالع مطمن وجميل
يملا الوش بكل أمان
هات لنا برضه شوال أحضان
وما تبخلش بلاش نسيان
مع جبر خواطر دفيان
هات أصحاب وجيران وحبايب
واللي فارقنا وعنا ده غايب
هات أحلام مخلوطة أمان
وقلوب بيضا صفاها حنان
عمرها مااسودت من شئ
وعيون بتسمي وبتصلي
تتمنى الخير وما تحسدش
متكحلة بجمال الصبح
وايدين صاينه العيش والملح
عمرها أبدًا يوم…. ماتخونش
هات جدعنه وشهامة كتير
م الطبطبه هات لنا قناطير
هات مفاهيم مش مغلوطة
أفكار واضحة ومش ملطوطه
وخدود لونها شبه القوطه
حمره حمار الناس الحلوة
اللي كلامهم لحن وغنوه
هات لنا فوطة لونها ذوات
نربط بيها راسنا شويه
لجل ماتهربش الحكايات
وتزيد ف زمانا المسافات
هات لنا طبلية تجمعنا
قاعده عليها ناس تسمعنا
نحكي ونحكي مايسبوناش
ويغطوا جروحنا بالشاش
ويطمنوا قلبنا والعين
هات طبقين زاد الغاليين
مع عيش طعمه مية نيل
ومتنساش… بصله وخياره
واعزم كل الجار والجاره
أكل الحب بركته تزيد
لما بتجمعنا المواعيد
شكلك كده هاتوه تتلخبط
وف مشوراك راح تتخبط
بص هاقولك حاجة بسيطة
هات لي العمر كده م الأول
وأنا هانقي اللي أنا عايزاه ….
