” في حُب مصر ” .. قصيدة للشاعر الدكتور محمد المنشاوي
إن مِيمها أصلُه نون مش جنون
اسم مصر أصله نصر
والتاريخ هوَّ الدليل
مصر مينا وإخناتون
يعني عدل يملا كون
مصر ناصر والسادات
سد عالي وإنجازات
شعبنا طول عمره ثائر
عمره ما عرف السُّكات
مصر طيبة وعين جالوت
أي غازي يخُش أرضِك
إمَّا يرحل أو يموت
مصر نيــل
واللي ع الشَّطّين نخيل
نخل شامخ مش مطاطي
فيه شموخ الفلاحين
مصر جيل من بعد جيل
هيَّ سعد الدين يا شاذلي
وانت يا أحمد يا اسماعيل
مصر هيَّ الأهرامات
هيَّ ساقية ف ألف يوم
هيَّ تمرة في الواحات
مصر سينا والعريش
يعني طور سيِّدنا موسى
والعيون بتصُب مّيَّة
دايرة سايرة متنتهيش
مصر دي رواية نجيب
والقعيد ويَّا الغيطاني
مصر يعني فتوَّة شهم
في قلب حارة الزَّعفراني
مصر ثومه وعندليب
شعب بيحب الغناوي
من ولادته للمشيب
مصر سبعة ف ألف عام
لمَّا بتخُش المعارك
تنهي وتخلَّص قوام
مصر سمَّاها الإله
هيَّ أم أحمد عُرابي
ومصطفى كامل معاه
مصر هيَّ أنتِ وأنا
أصل ثابت ،
فرع عالي في السَّما
يابلادي أنا كُلِّي ليكي
بفتخِر دايمًا بحاضرِك،
وبماضيكــي
مصر هيَّ الشَّمس صافية في الأصيل
طول ما فيه دم ف عروقنا
طول ما فيه شطِّين ونيل
طول ما روحنا جوَّا روحنا
تنحني أو يوم تميل
يا وطنَّا مستحيل ،،،