حكاية ” رمسيس ” .. أول عربية مصرية

تقرير مصور يكتبه / أحمد ناصر البنا

فكرة تصنيع عربية مصرية بدأت مع “رمسيس” سنة ۱۹٥۸ كان الدكتور عزيز صدقى وزير الصناعة راح ليه أتنين شباب ( جورج حاوى ، وحسام ابو العلا ) واتقدموا ليه بفكرة اول عربية مصرية واتوافق ليهم إنشاء مصنع بس بشرط تقديم عينة من العربية اللى هيصنعوها وان وزارة الصناعة تختبر العربية

واللى حصل بعد كدة ان الاتنين اتقدموا بعربية انجليزى كان بيتم انتاجها على نطاق صغير اسمها “فريسكى سبورت” موجودة فى أول صورة والوزارة قررت أنها تختبر العربيتين من أسكندرية  لمرسى مطروح

وفى نص الطريق عربية منهم عطلت واتعمل بعد كدة مسابقة بمكافئة ۱۰۰ جنيه عن اللى يختار اسم اول عربية تنتجها مصانع الهيئة العامة بشرط أنه يكون اسم صغير وسهل ترجمته

ووقع الاختيار على اسم “رمسيس” وشركة “فريسكى سبورت” شحنت لمصر ۲٥ عربية بعلامات رمسيس بدل “فريسكى” وعدادات بالعربى وكبروا حجم العربية شوية علشان تشيل ركاب أكتر

وكان أول ظهور ل “رمسيس” يوم ۲۳ يوليو ۱۹٥۹ لكن المشاكل اللى بين الحكومة المصرية والانجليزية كانت اكبر بكتير من المشروع ده خصوصا بعد حرب ۱۹٥٦ وازمة قناة السويس ومصادرة املاك الانجليز فى مصر

وتوقف المشروع مع شركة “فريسكى سبورت” ومع الاسف ولا واحدة من ۲٥ عربية موجودة دلوقتى.

قدموا بعد كدة نموذج من انتاج شركة “NSU” الالمانية وموديلها يوتليكا سنة ۱۹٦۱ موجودة فى تانى صورة واتوافق بعد كدة على انتاج (تجميع) العربية باسم رمسيس والدولة اديتهم أرض يبنوا عليها المصنع فى أول طريق مصر-اسكندرية الصحراوى

وانشأوا المصنع واتجهوا لتجميع موديل “NSU Prinz IV” بس بعلامات رمسيس وعداد عربى من أول سنة ۱۹٦۳ وتشجيعا ليهم وزارة الصناعة كلفت الهيئة العامة ل التصنيع بالتعاقد معاهم على شراء ۲۰۰ عربية سعر العربية

فى الوقت ده كان ٤۰۰ جنيه واتدفع سعرهم مقدم كمساعدة فى انهم يكملوا المشروع. العربية كانت ضعيفة جدا موتور خلفى اتنين سلندر تبريد هواء ٥۹۸ سى سى (موتور موتوسيكل) ونزلت العربية السوق وبحكم الحماس الوطنى فى الفترة دى العربية اتقابلت باقبال ناس عليها.

مصنع العربية كان بدائى جدا لانه كان بيصنع البودى بتاع العربية يدويا على اسطمبات خشب مش مكابس الية والمصنع كان بينتج من ٥-٦ عربيات فى اليوم وده ضعيف جدا جدا مقارنة بالمصانع العالمية فى الفترة دى اللى كانت ٧٥ عربية فى اليوم زى مصنع فولكس فاجن.

سنة ۱۹٦٥ وصل عدد العربيات الرمسيس اللى تم انتاجهم ۱٧۰۰ عربية بمتوسط ۳٥۰ عربية فى السنة وده انتاج ضعيف جدا. سنة ۱۹٦٦ انتجوا موديل كابريوليه اسمه “رمسيس جميلة كابريوليه” وده بيتصنف نادر جدا موجود فى رابع صورة.

وفى برضو رمسيس بيك اب ل التوزيع الخفيف ورمسيس فان واللى كانت مخصصة لهيئة البريد المصرية موجودين فى خامس صورة.

ودخل مصنع النصر للسيارات المنافسة فى سنة ۱۹٦۱ باستثمارات ضخمة من شركة فيات الايطالية علشان يكون بداية النهاية لشركة السيارات المصرية “رمسيس”

وبدأ ينتج العربيات نصر/الفيات وعلى طول وضح الفرق الكبير جدا بين العربية رمسيس والنصر/ فيات اللى هى معمولة صح بجودة اعلى وامكانيات اكتر ومحرك أقوى ونزل الموديل نصر ۱۱۰۰ بسعر ٧۰۰ جنيه

وبعده موديل نصر/فيات ۱۳۰۰ وبدأ الاقبال على العربية “رمسيس” يقل جدا على الرغم من ان نصر كانت اغلى من رمسيس لكن تسهيلات السداد فى نصر/فيات كانت لمدة اطول من رمسيس

ومع الوقت الشركة عرفت انها مش هتقدر تنافس النصر لصناعة السيارات اتجهت الشركة لتصنيع الفان والعربيات النقل
سنة ۱۹٦۹ اشترت شركة فولكس فاجن مصنع NSU فى المانيا بعد ما بدأت تحس ان هيكون منافس ليها خصوصا بعد انتاج شركة “NSU” موديل 1000 C/TT/TTS لانه كان بينزل بمحرك ۱۲۰۰ سى سى تبريد هواء قريب جدا من محركات فولكس فاجن وانقطعت معاها توريدات شركة رمسيس.

سنة ۱۹٧۲ شركة “رمسيس” انتجت عربيتين اربعة ابواب كنموذج علشان تنافس بيه النصر للسيارات موجودين فى الصورة الاخيرة لكن مع الاسف فشلوا فى التصنيع والمنافسة و واحدة من العربيتين دول موجودة لسة لحد النهاردة وانتهت اول شركة سيارات مصرية فى اوائل سنة ۱۹٧۳…