” مشاعر شاعر ” يكتبها الشاعر : عاطف محمد

أنا عاطف
ماحد عليا
كان عاطف
بابيع الورد ف الميادين
ماحد ادانى يوم ورده
وارش الميه ف البساتين
ماخدت شويه بموده
فرشت مفارش الأفراح
ماحد طلبنى يوم اقعد
ورشرشت الهوا تفاح
قالولى كفايه روح وابعد
وعلمت الكتير علمى
وادبت الكتير ادبى
فضنوا عليا بعلومهم
وقالوا ذكاء اكيد منا
وحتى أدبنا تفصيلنا
كتبت الشعر امدحهم
فجحدوا دورى واتمرعوا
وخدت بأيد كتير منهم
وسابوا ايدى ع الهوه
ودللدلت الحبال أنقذ
كذا يوسف من الابيار
لقيته بيشكر الاحبال
وحتى ماشفشى بالانظار
إيديا وجرحى ودماها
ولاعرق الجبين ساعة
وكنت باشد بنباهه
عشان وانا بارفعه جنبى
مايت خبطشى ف الجدران
ووعيت الكتير يفهم
و مش فاهم
كمان يسأل
ولما سألت عن عنوان
فعمل الكل من بنها
شاركت ورحت ف الأحزان
لقيت الكل مناديلهم
ف حالة غلق
لدموعى
سابوها تبل جلابيتى
ماحدش قال هانغسلها
هاننشرها
ف شمس الحب
ولما تجف نكويها
وفعلا قاموا كوينها
بهجر البين ورشوا
مادة تكويها
وريحة عرقى لامتهم
زرعت الود جواهم
ويوم عيدى ماعرفونيش
ولملمت الكسور فيهم
ويوم كسرى ماجبرونيش
ووديت القريب منهم
ورديت الغريب عنهم
سقيت العطشانين منهم
وكنت حراسة لزمانهم
وسابوا حروبى وفاتونى
وجايز قبضوا يوم بيعى
وفرحوا كتير لتقطيعى
أكلنا من طبق واحد
وأكل الصحبة عهد ودين
لقيت الطبق مكسور
ومرمى حتى ف المواعين
ولاعدى على الموازين
زرعت الأرض بالاصناف
وقولت الكل راح ياكل
وتم عدالة التوزيع
خدوا المحاصيل بأنواعها
ماسابوا حتى قشايه
ولا بذرايه ونوايه
وسابوا جواب
بلون باهت
ومتعلق ف شجرايه
بلاش الكسل يلا
وازرع
زود الغله
ها نيجى يوم
حصاد الغيط
ويستحسن ماتبقاشى
هنا موجود
عشان مانشوفشى كرمشتك
وضهرك إللى انحنى م الشغل
ده صعب نشوف هذا المنظر
وخلى الصورة تتمخطر
ف اذهانا لطول العمر
ويفضل للبهاء عاطف
ويصبح للنماء عاطف
ويرضى بالبلاء عاطف
ويمسح دمعنا عاطف
ويجمع جمعنا عاطف
ويحمل همنا عاطف
يحارب حربنا عاطف
ويتلقى السهام عاطف
يلوم الناس كمان عاطف
ويدينا الفلوس عاطف
ويجبر كسرنا عاطف
ويفتح نفسنا عاطف
ويزرع وردنا عاطف
ويسمع للكلام عاطف
يارب تكون فهمت يا……..
عاطف