” ف الحلم… ” للشاعر : عاطف محمد .. من ديوان ( أميرة الجنة )

مش قادر افرح من غيرك
ولا قادر أحس بحاجه حلوة
طعم الأيام بقى كله مرار
مخلوط بعذاب
مليون سنه فاتوا
والضحكة فارقت مش راجعه
خدت الاحلام مشوار لبعيد
الحلم عنيد
وعناده ساكن …ف العالى
طوالى باشوفك ف كلامى
عماله ترتبى أيامنا
وترصى الفكرة…. مع الفكرة
على كل رفوف
معمولة بشوق
متلونه ذوق
كل الأفكار… بترصيها
ف تعدى حدودها… بنفسيها
وتصير فيضان
فى محيط. واسع
واتاخر حبه. واناديكى
تعى جنبى
عندى مكان واسع
فينك ماجتيش
ف الحلم يومين
حرمانى ليه…. من رؤياكي
تتنهد عينها وتتكلم
والننى يقول…. زعلان منكم
100 مرة أقول
مش عايزه الحزن
ولا دمع على الخدين…. يسكن
ولا روح تتأذى… لفراقى
ده مافيش ف الكون
انسان باقى
مش باقى
غير وجه الواحد
وماينكر غير
انسان جاحد
وبسرعة…. تغطينى رموشها
وايديها ….تحضن ف ايديه
ونطير ….بجناح الشفافية
نوصل للقمره المسحورة
نعمل عرسان
وناخد صورة
فيها الألوان
مرشوش المسك…. ف حواليها
وطيور الماس
عاملين حراس
بيفرقوا فل.بيتعايق
100 ألف كمنجه
بصوت رايق
تعزف أنوار
عشقانه حوار
الهمس بصدقه
بيسحرنا
والاقى قلبى…. يدق بعنف
وايديه تصرخ
مش سايبه
شبكة صوابعنا…. وحشتنى
تهمس وتقولى
اطمن
ف الحلم
هاجيلك من تانى
ف الحب.. ماتبقاش… حد انانى
خلينى ابص على ولادى
واطمن عينهم
بالرؤية
ماانا قولت
مافيش ايام باقية
غير وجه بس
مافيش …. غيره